Policia e Kryeqytetit ka arrestuar tre persona të dyshuar për vjedhje dhe përvetësim të sendeve të përfituara në mënyrë të paligjshme.
Sipas Drejtorisë së Policisë, pas veprimeve operative dhe informatave të siguruara nga Njësia e Inteligjencës e Stacionit Policor Qendra, janë arrestuar A.H., 44 vjeç, E.I., 32 vjeç, dhe A.Z., 25 vjeç.
Dy të parët dyshohen për kryerjen e veprës penale “Vjedhje”, ndërsa i treti dyshohet për “Blerjen, pranimin ose fshehjen e sendeve të përfituara nga kryerja e veprës penale”.
Hetimet e Sektorit të Hetimeve të Kryeqytetit kanë nxjerrë prova lidhur me rreth 10 raste të dyshuara. Policia gjithashtu ka sekuestruar sende të dyshuara si të përfituara nga këto vepra, të cilat do t’u rikthehen pronarëve pas përfundimit të procedurave.
Në koordinim me Prokurorinë e Shtetit, të arrestuarit janë dërguar në mbajtje për 48 orë.