Tre persona janë lënduar si pasojë e një shpërthimi që ka ndodhur në një lokal në Podujevë.

Sipas Policisë së Kosovës, rasti ka ndodhur rreth orës 08:30 në rrugën “4 Dëshmorët”.

Dyshohet se shpërthimi është shkaktuar nga një bombolë gazi.

Zëdhënësja e Policisë, Flora Ahmeti, ka bërë të ditur për Dukagjinin se njësitet policore kanë dalë menjëherë në vendin e ngjarjes dhe se të lënduarit janë dërguar për trajtim mjekësor në Urgjencën e qytetit.

Policia është ende në vendngjarje dhe po heton rrethanat e plota të incidentit.