Tre persona janë vrarë dhe disa të tjerë janë plagosur si pasojë e sulmeve ajrore izraelite të kryera në orët e para të mëngjesit të së shtunës, ndërsa sulmet në jug të Libanit po intensifikohen, raportoi Agjencia Kombëtare e Lajmeve e Libanit (NNA).

Dy prej viktimave janë identifikuar si babë e bir të cilët u vranë në një sulm ajror të forcave izraelite në shtëpinë e tyre në lagjen Al-Marj të qytetit Ansar, në veri të Tyros.

Sipas NNA-së, shtatë anëtarë të tjerë të familjes mbetën të plagosur, shkruan Al Jazeera, transmeton Dukagjini.

Agjencia shtetërore raportoi gjithashtu se forcat izraelite kryen një tjetër sulm ajror mëngjesin e së shtunës në rrugën Sharifa–Habbouch–Nabatieh, ku u vra një civil dhe një tjetër mbeti në gjendje kritike.

Një sulm tjetër ajror izraelit u raportua, ku sipas raportimeve tre persona u plagosën.

NNA bëri të ditur gjithashtu se rreth orës 08:15 sipas kohës lokale (05:15 GMT), qyteti Ansar u godit nga një sulm ajror që shkatërroi qendrën tregtare Al-Khalil në qendër të qytetit.

Ndërkaq, në orën 09:30 qyteti Zabadini u godit nga një seri sulmesh ajrore izraelite.