Në palestrën “Minatori” në Mitrovicë, sonte pritet një tjetër kapitull i zjarrtë i betejës gjysmëfinale në play-offin e Superligës së Kosovës në basketboll.

Përballë njëra-tjetrës dalin Trepça dhe Peja, në ndeshjen e tretë të serisë që tashmë ka marrë ritëm dramatik.

Pas dy përballjeve të para, gjithçka mbetet e hapur – seria është e barabartë 1:1.

Trepça fitoi ndeshjen e parë si vendase, ndërsa Peja u kundërpërgjigj në takimin e dytë, duke barazuar gjithçka.

Tani, skena rikthehet sërish në Mitrovicë, aty ku Trepça synon të rimarrë epërsinë dhe të shfrytëzojë mbështetjen e madhe të tifozëve.

Por përballë ka një Pejë të etur për surprizë, skuadër që ndonëse e mbylli stinorin e rregullt në pozitën e pestë, tregoi karakter duke eliminuar Yllin në çerekfinale.

Përballja mes Trepçës dhe Pejës fillon në ora 19:30.

Ndërsa në finale do të kualifikohet skuadra që arrin tri fitore në seri.