Ylli rrezikon ta humbasë titullin pas fitores së Trepçës, në finalen e tretë të “plejoffit” në 2:1.
Ndërsa, ndeshja ishte aq dramatike dhe emocionuese për sallën e stërmbushur me tifozë, ku mitrovicasit në sallën “13 Qershori” të Suharekës kanë shënuar fitore me një epërsi prej 3 pikë më shumë, 58:55 ndaj vendasve.
Ndeshja e cila u zhvillua me një palestër të stërmbushur nga shikuesit, ishte e hapur deri në fund, por që në këtë takim vendosi një seri 11:0 e Trepçës në çerekun e katërt. Në minutat e fundit, falë përvojës së Drilon Hajrizit dhe Amin Hotit, Trepça ia doli ta ruajë epërsinë dhe fitoi me tri pikë dallim, 58:55.
Hajrizi u shqua te Trepça me 21 pikë, nëntë kërcime e pesë asistime. Qendra Andrew Gordon ndeshjen e mbylli me 12 pikë e plot 16 kërcime. Ndërkohë Hot shtoi dhjetë pikë, pesë kërcime e pesë asistime.
Chris Harris kishte statistikat më të mira te Ylli. Ai ndeshjen e mbylli me tetë pikë e njëmbëdhjetë kërcime. Dajuan Graf shtoi 14 pikë, gjashtë kërcime e tetë asistime. Mikaile Tmushiq i shtoi 13 pikë. Henrik Shirkoi realizoi 11 pikë, por me efikasitet të dobët.
Ylli po synon ta mbrojë titullin, ndërsa Trepça ta fitojë atë pas dhjetë vjetësh. Ndeshja e katërt do të luhet mesjavën e ardhshme në Mitrovicë.