Ndërmarrja “Trepça” ka bërë të ditur se në hapësirat e saj janë evidentuar dy raste të vjedhjes së pjesëve të trafove, duke theksuar se incidentet nuk kanë ndikuar në funksionimin aktual të ndërmarrjes.
Sipas njoftimit zyrtar, trafot e përfshira nuk kanë qenë në përdorim për një kohë të gjatë dhe më herët kanë shërbyer në njësi që tashmë janë jashtë funksionit. Për këtë arsye, nga menaxhmenti theksohet se këto raste nuk kanë pasoja në aktivitetin operativ apo afarizmin e ndërmarrjes.
Po ashtu, bëhet e ditur se pajisjet në fjalë kanë qenë të planifikuara për zhvendosje edhe para se të ndodhte vjedhja, çka sipas ndërmarrjes e minimizon ndikimin e incidentit.
“Trepça” ka njoftuar se do të ndërmarrë të gjitha veprimet e nevojshme për trajtimin e rastit, përfshirë formimin e komisioneve për vlerësimin e dëmit dhe shqyrtimin e rrethanave në tërësi. Ndërkohë, është konfirmuar edhe bashkëpunimi me organet kompetente për hetimin e rastit.
Nga ndërmarrja është bërë e ditur se opinioni publik do të informohet për çdo zhvillim të mëtejmë lidhur me këtë çështje.