Policia e Kosovës ka nisur një hetim mbi një rast të mundshëm të “shtytjes në vetëvrasje” pas një incidenti në Gjakovë, ku tri nxënëse të mitura kanë lënduar veten.
Sipas njoftimit të Policisë, rasti ka ndodhur të hënën rreth orës 10:30.
Rastin në polici e ka raportuar drejtoresha e Arsimit në Gjakovë, Eranda Kumanova- Baçi.
Ndërsa, të miturat janë dërguar në spital për tretman mjekësor.
“Gjakovë 07.10.2024 – 10:30. Drejtoresha e DKA-së ka njoftuar se tri nxënëse janë viktima të fenomenit të vet–lëndimit. Tri viktimat femra kosovare të mitura, janë dërguar në tretman mjekësor. Rasti duke u hetuar”, thuhet në raportin 24-orësh të Policisë.
Dukagjini ka kontaktuar Policinë e Kosovës për më shumë detaje rreth rastit, por deri në publikimin e lajmit nuk janë përgjigjur.