Presidenti amerikan Donald Trump dyshohet se ka ndërruar avion fshehurazi gjatë largimit nga samiti i NATO-s në Turqi muajin e kaluar, në kuadër të një mase të pazakontë sigurie pas një kërcënimi të mundshëm nga Irani.
Sipas raportimeve të mediave amerikane, përfshirë The Washington Post dhe CBS News, autoritetet amerikane kishin zbuluar një kërcënim të besueshëm se Irani mund të sulmonte me raketë avionin presidencial.
Trump u pa nga kamerat televizive duke hipur në Air Force One në aeroportin e Ankarasë më 8 korrik. Megjithatë, sipas The Washington Post, presidenti nuk qëndroi në atë avion. Ai u transportua fshehurazi në një tjetër avion ushtarak, një C-32A, i cili është një version i modifikuar i Boeing 757 dhe përdoret shpesh për udhëtimet e nënpresidentit amerikan.
Sipas gazetës, ndërrimi i avionit u realizua përmes një kamioni që përdoret për furnizimin me ushqim të avionëve. Kamioni u ngrit në lartësinë e avionit dhe shërbeu si rrugë për transportimin e Trumpit, në anën tjetër të avionit nga ajo ku ai ishte parë duke hipur.
Sekretari amerikan i Mbrojtjes, Pete Hegseth, hipi veçmas në C-32A përmes shkallëve të jashtme, në mënyrë që lëvizja e avionit të dukej normale.
Ndërkohë, gazetarët dhe disa pjesëtarë të stafit të Shtëpisë së Bardhë hipën në Air Force One dhe, sipas raportimeve, iu kërkua të mbyllnin grilat e dritareve. Ata nuk ishin në dijeni se presidenti nuk ndodhej më në avion.
Trump më pas udhëtoi me C-32A drejt Mbretërisë së Bashkuar, përpara se të rikthehej në Air Force One-in e vjetër. Ai u pa duke zbritur nga avioni pas uljes në bazën ajrore RAF Mildenhall.
Nuk është e qartë se si Trump u transferua sërish nga C-32A në Air Force One-in e vjetër. Më pas, presidenti përdori avionin e ri presidencial, një Boeing 747-8 të dhuruar nga Katari, për t’u kthyer në Uashington.
Trump kishte mbërritur në Turqi me avionin e ri të dhuruar nga Katari, por kishte deklaruar se do të largohej me Air Force One-in e vjetër, “për hir të kohëve të vjetra”.
Gjatë fluturimit të kthimit, Trump foli me gazetarët dhe pranoi se ekzistonte një kërcënim i vazhdueshëm ndaj tij. Ai tha se Irani e konsideronte atë si “objektivin numër një”.
I pyetur se përse gazetarëve u ishte kërkuar të mbyllnin grilat e dritareve gjatë fluturimit nga Turqia, Trump u përgjigj se kjo ishte për shkak të rrezikut që paraqisnin kundërshtarët me të cilët përballeshin.
Shtëpia e Bardhë nuk e ka konfirmuar zyrtarisht ndërrimin e fshehtë të avionit. Drejtori i komunikimit të Shtëpisë së Bardhë, Steven Cheung, nuk e konfirmoi dhe as e mohoi raportimin, por tha se avioni i ri presidencial është një mjet “i teknologjisë së fundit”, i pajisur me masa sigurie për mbrojtjen e presidentit dhe stafit të tij.
Më herët, inteligjenca amerikane kishte paralajmëruar për një kërcënim specifik ndaj Trumpit ose avionit të tij, sipas raportimeve të mëparshme të CBS News.
Ndërrimi i dyshuar i avionit ndodhi një ditë pasi SHBA-ja rifilloi sulmet ushtarake ndaj Iranit, pas dështimit të negociatave mes Uashingtonit dhe Teheranit për përfundimin e luftës.