Presidenti amerikan, Donald Trump, ka deklaruar se e konsideron “tradhti” që njerëzit të thonë se Shtetet e Bashkuara nuk po “fitojnë” luftën me Iranin, pavarësisht se më herët kishte njoftuar Kongresin se armiqësitë kanë “përfunduar”.
“Ne kemi të majtën radikale që thotë: ‘Nuk po fitojmë, nuk po fitojmë.’ Ata nuk kanë më asnjë ushtri. Është e pabesueshme. Në fakt, në fakt, unë besoj se është tradhti, në rregull. Doni të dini të vërtetën – është tradhti,” tha Trump gjatë një fjalimi në The Villages, Florida.
Duke folur për veprimin e shpejtë ushtarak në Venezuelë në janar, të cilin e quajti “një nga lëvizjet më të mëdha ushtarake në histori”, Trump tha se nuk dëshiron të flasë shumë herët për fitoren në Iran, shkruan CNN, transmeton Dukagjini.
“Po bëjmë pothuajse po aq mirë në Iran. Por nuk më pëlqen të flas për këtë derisa punët të përfundojnë,” tha ai, pa pranuar dallimet e qarta mes dy konflikteve.
Trump ka thënë vazhdimisht se SHBA-ja ka shkatërruar marinën iraniane dhe ka theksuar “gjeniun” e bllokadës amerikane ndaj anijeve që hyjnë dhe dalin nga portet iraniane. Megjithatë, Irani ende ruan ndikim mbi Ngushticën e Hormuzit.