Presidenti i Shteteve të Bashkuara të Amerikës, Donald Trump, ka reaguar ashpër ndaj performancës së këngëtarit portorikan Bad Bunny në “Halftime Show” të Super Bowl-it, duke e cilësuar atë si “absolutisht të tmerrshme” dhe “një nga më të këqijat ndonjëherë”.
Në një postim në rrjetet sociale, Trump e quajti shfaqjen “një shuplakë në fytyrë për vendin tonë”, duke shtuar se nuk kishte “asgjë frymëzuese” në atë që ai e përshkroi si një “rrëmujë të quajtur Halftime Show”.
“Nuk ka asnjë kuptim. Është një fyerje për Madhështinë e Amerikës dhe nuk përfaqëson standardet tona të suksesit, kreativitetit apo ekselencës. Askush nuk kupton asnjë fjalë nga ajo që thotë ky djalë dhe kërcimi është i neveritshëm, veçanërisht për fëmijët e vegjël që po e shikojnë në mbarë SHBA-në dhe botën”, ka shkruar Trump.
Bad Bunny kishte qenë në qendër të kritikave nga qarqe konservatore që prej momentit kur u njoftua vitin e kaluar si performues i Super Bowl-it.
Artisti fitues i çmimit “Grammy” solli në skenën e Levi’s Stadium në Santa Clara, Kaliforni, elemente të forta të kulturës së Puerto-Ricos, duke interpretuar hitet e tij kryesisht në gjuhën spanjolle.
Shfaqja kulmoi me një moment simbolik, ku Bad Bunny prezantoi vendet e kontinenteve amerikane, nga Kili në jug deri në Kanada në veri, për ta përmbyllur me Puerto-Ricon, vendlindjen e tij.
Gjatë një prej tranzicioneve muzikore, ai foli për rrugëtimin e tij drejt kësaj skene, duke thënë “Jam këtu sepse kurrë nuk reshta së besuari në veten time, dhe edhe ti duhet të besosh në veten tënde”.
Performanca u shoqërua me një skenografi që përfaqësonte fushat e kallamit të sheqerit në Karaibe, përfshirë Puerto-Ricon dhe Kubën, ndërsa në një moment ai ndaloi edhe pranë një stende tradicionale me akull të grirë.
Bad Bunny i kushton shfaqjen e Super Bowl-it Porto Rikos, mes mesazheve për unitet
