Presidenti amerikan Donald Trump ka hedhur poshtë pretendimet se SHBA-ja po përballet me mungesë të municioneve gjatë luftës me Iranin, por një dokument i Pentagonit tregon se udhëheqja ushtarake amerikane po u kërkon kompanive të mbrojtjes të rrisin ndjeshëm prodhimin e armëve.
Sipas The Washington Post, zëvendëssekretari amerikan i Mbrojtjes, Steve Feinberg, u ka kërkuar drejtuesve të industrisë së mbrojtjes që të përshpejtojnë ndjeshëm afatet e furnizimit dhe të rrisin prodhimin e pajisjeve dhe armëve kritike.
Në një memorandum të dërguar kompanive, Feinberg u ka kërkuar atyre që brenda 21 ditësh të paraqesin plane konkrete për mënyrën se si mund të rrisin kapacitetet prodhuese.
“Ciklet e zhvillimit që zgjasin me vite nuk janë të pranueshme. Duhet të përshpejtojmë në mënyrë dramatike programet tona dhe të zgjerojmë menjëherë kapacitetet e prodhimit”, thuhet në memorandumin e siguruar nga The Washington Post.
Zëdhënësi kryesor i Pentagonit, Sean Parnell, ka konfirmuar se memorandumi është autentik.
Sipas tij, dokumenti do të merret parasysh në përgatitjen e buxhetit amerikan për vitin fiskal 2028 dhe është në përputhje me përpjekjet e administratës për të rindërtuar dhe zgjeruar bazën industriale të mbrojtjes së SHBA-së.
Kërkesa vjen në një kohë kur lufta me Iranin po vazhdon, ndërsa administrata Trump mohon se arsenali amerikan i municioneve po shteron.