Presidenti amerikan, Donald Trump ka deklaruar se Irani mund të kontaktojë Shtetet e Bashkuara në çdo kohë nëse dëshiron të negociojë për përfundimin e luftës, por duhet të pranojë që nuk do të ketë kurrë armë bërthamore.
Duke folur për Fox News, Trump tha se nëse Irani dëshiron bisedime “mund të telefonojë ose të vijë te ne”, duke shtuar se ekzistojnë linja të sigurta komunikimi mes dy vendeve.
Ai theksoi se kushti kryesor i SHBA-së mbetet i pandryshuar: “Irani nuk mund të ketë armë bërthamore”.
Ndërkohë, përpjekjet diplomatike vazhdojnë përmes ndërmjetësve, ku Pakistani dhe Omani kanë zhvilluar kontakte me ministrin e Jashtëm iranian Abbas Araghchi, i cili të hënën ka udhëtuar për në Rusi për t’u takuar me presidentin Vladimir Putin.
Sipas agjencisë gjysmëzyrtare iraniane Fars, Teherani i ka dërguar “mesazhe të shkruara” SHBA-së përmes Pakistanit, ku ka përcaktuar vijat e kuqe, përfshirë çështjet bërthamore dhe situatën në Ngushticën e Hormuzit. Megjithatë, këto nuk konsiderohen negociata formale.
Në Lindjen e Mesme, në Liban, sulmet izraelite të dielën kanë vrarë 14 persona dhe kanë plagosur 37 të tjerë, sipas Ministrisë së Shëndetësisë, në kuadër të armëpushimit mes Izraelit dhe Libanit.