Presidenti i Shteteve të Bashkuara të Amerikës, Donald Trump, ka deklaruar se Ngushtica e Hormuzit do të rihapet “së shpejti” ose ai do të nisë një sulm të ri të ashpër ndaj Iranit.
Duke folur në një intervistë në Fox News, Trump tha se “diskutime shumë të mira” ishin duke u zhvilluar me Teheranin, por paralajmëroi se nëse Irani tërhiqet do të kthehej në sulme, shkruan CNN, transmeton Dukagjini.
“Ngushtica do të hapet shumë shpejt ose ata do të goditen shumë rëndë. Nëse ata tërhiqen përsëri, ata do të goditen shumë rëndë. Ata e dinë këtë. Ata e kuptojnë këtë. Unë nuk kam zgjidhje tjetër”, tha Trump.
Trump tha se zgjedhja e tij e parë nuk ishte rinovimi i sulmeve, por në vend të kësaj ndjekja e një marrëveshjeje diplomatike.
“Ne i goditëm ata shumë, shumë fort. Por goditja e fortë nuk ka ardhur ende dhe shpresojmë se nuk do të na duhet ta përdorim. Shpresoj se nuk do të na duhet – po zhvillojmë diskutime shumë të mira. Ata nuk duan ta pranojnë këtë.”
Irani ka mohuar se po zhvillon diskutime të drejtpërdrejta me Shtetet e Bashkuara. Në vend të kësaj, Teherani ka thënë se po punon me Omanin për një marrëveshje për rihapjen e Ngushticës.
Ndërmjetësit shpresojnë që sapo Ngushtica të rihapet, SHBA-të dhe Irani mund të rifillojnë bisedimet bërthamore.