Presidenti i SHBA-së, Donald Trump, ka mohuar se po shqyrton mundësinë e kandidimit për një mandat të tretë presidencial, një veprim për të cilin ekspertët bien dakord se është i ndaluar sipas Kushtetutës së SHBA-së.

“Do të jem një president tetëvjeçar, do të jem një president dy-mandatesh. Gjithmonë kam menduar se kjo ishte shumë e rëndësishme”, tha Trump në emisionin “Meet the Press with Kristen Welker” të NBC-së në një intervistë që u transmetua të dielën.

Trump, 78 vjeç, ka thënë më parë se “nuk po bënte shaka” kur tha se donte të shërbente një mandat të tretë, apo edhe të katërt, si president i SHBA-së.

Ai më vonë tha se deklaratat e tij kishin për qëllim të tallnin “mediat e lajmeve të rreme”.

Kompania e tij, The Trump Organization, ka shitur kapele “Trump 2028”, duke nxitur spekulime se ai mund të kërkojë të qëndrojë në detyrë pasi të përfundojë mandati i tij i dytë në janar 2029.

Në intervistën, të regjistruar nga rezidenca e tij në Florida të premten, Trump tha se ka pasur shumë “kërkesa” nga njerëz që i kërkojnë të shqyrtojë mundësinë e qëndrimit në detyrë.

“Shumë njerëz duan që unë ta bëj këtë”, tha Trump, vetëm disa ditë pasi festoi 100 ditët e para të mandatit të tij të dytë.

“Është diçka që, për aq sa di unë, nuk të lejohet ta bësh. Nuk e di nëse është kushtetuese që ata nuk po të lejojnë ta bësh apo diçka tjetër”, tha Trump.

Ai shtoi se “ka shumë njerëz që po shesin kapelen e vitit 2028”.

“Por kjo nuk është diçka që dua të bëj”, tha ai, duke vazhduar të rendiste disa republikanë që mund të zënë vendin e tij, përfshirë nënkryetarin JD Vance dhe sekretarin e shtetit Marco Rubio.

Amendamenti i 22-të i Kushtetutës thotë se “asnjë person nuk mund të zgjidhet në detyrën e Presidentit më shumë se dy herë”.

Ndryshimi i Kushtetutës do të kërkonte miratimin e dy të tretave si nga Senati ashtu edhe nga Dhoma e Përfaqësuesve, si dhe miratimin e tre të katërtave të qeverive në nivel shtetëror të vendit.

Megjithatë, disa mbështetës të Trump sugjerojnë se ekziston një boshllëk në Kushtetutë, i cili nuk është testuar në gjykatë.

I pyetur nga NBC nëse dikush i është drejtuar me këto teori, Trump shmangu përgjigjen, duke u përgjigjur se “në cilësinë e një mbështetësi të madh, shumë njerëz kanë thënë gjëra të ndryshme”.

‘Periudha e tranzicionit’ e tarifave

Gjatë intervistës, Trump hodhi poshtë gjithashtu kritikat për mënyrën se si e trajtoi ekonominë.

“Shiko, po. Gjithçka është në rregull”, tha ai pasi plani i tij tarifor tronditi ekonomitë ndërkombëtare, duke bërë që ekonomia amerikane të tkurret për herë të parë që nga viti 2022.

“Thashë, kjo është një periudhë tranzicioni. Mendoj se do të ia dalim fantastikisht”, shtoi ai.

I pyetur nëse ekonomia amerikane mund të vazhdojë të tkurret, ai u përgjigj: “Çdo gjë mund të ndodhë. Por unë mendoj se do të kemi ekonominë më të madhe në historinë e vendit tonë.”

Më vonë ai shtoi se ekziston mundësia që tarifat të jenë të përhershme, duke i thënë intervistuesit: “Nëse dikush mendonte se do të hiqte dorë nga marrëveshja, pse do të ndërtonte në Shtetet e Bashkuara?”

Trump gjithashtu mohoi se amerikanët do të duhet të përgatiten për të parë më pak mallra në shitje në dyqane, ndërsa lufta tregtare vazhdon./BBC