Presidenti amerikan, Donald Trump, ka kritikuar kompanitë e naftës për “fitim të tepërt” nga çrregullimi i tregut global të energjisë i shkaktuar nga lufta e tij kundër Iranit.
Nafta e papërpunuar tregtohej me rreth 70 dollarë për fuçi para sulmeve të para SHBA-Izrael në fund të shkurtit, por deri në fund të prillit ishte rritur deri në 126 dollarë dhe tani po tregtohet me rreth 85 dollarë për fuçi.
Presidenti amerikan ka shënjestruar fitimet e papritura të zbuluara javën e kaluar nga “ExxonMobil” dhe “Chevron”, dhe ka thënë se kompanitë do t’ia “kthenin një pjesë të kësaj publikut”.
“Ata po fitojnë shumë para bazuar në një mungesë”, u ka thënë ai gazetarëve në Shtëpinë e Bardhë të hënën në mbrëmje. “Nuk më pëlqen”, ka shtuar presidenti amerikan.
Trumpi ka folur vetëm disa orë para se kompania “BP” të raportonte se fitimet e saj ishin dyfishuar në tremujorin e fundit, në 5.7 miliardë dollarë.
Kompanitë amerikane të naftës realizuan fitime që arrinin në total më shumë se 26 miliardë dollarë për tre muajt deri në fund të qershorit duke përfituar nga çrregullimi i tregut të energjisë i shkaktuar nga lufta SHBA-Izrael kundër Iranit.
“Chevron” ka raportuar fitimin e saj më të lartë tremujor prej 12.2 miliardë dollarësh, një rritje pesëfish në krahasim me të njëjtën periudhë të vitit të kaluar. “ExxonMobil” ka raportuar një fitim prej 14.5 miliardë dollarësh në tremujorin e dytë, dyfishi i asaj që kishte fituar në të njëjtën periudhë të një viti më parë dhe fitimi i saj më i lartë tremujor që nga pushtimi i Ukrainës nga Rusia në vitin 2022.
“Chevron: shumë para. ExxonMobil: shumë para”, është shprehur Trumpi. “Ata do t’ia kthejnë një pjesë të kësaj publikut dhe është më mirë të ulin çmimin me pakicë, çmimin e konsumatorit”, ka shtuar ai.
E pyetur për komentet e Trumpit, drejtoresha ekzekutive e “BP”, Meg O’Neill, i ka thënë CNBC-së se ajo i kuptonte presionet mbi familjet.