Ministria turke e Mbrojtjes ka deklaruar se ka ndërmarrë sulme ajrore mbi rajonet veriore të Sirisë dhe Irakut, duke vënë në shënjestër grupet kurde që Ankaraja i konsideron përgjegjës për sulmin me bombë të javës së kaluar në Stamboll.

Sipas ministrisë, sulmet goditën bazat e Partisë së jashtëligjshme të Punëtorëve të Kurdistanit, ose PKK, dhe Njësitë e Mbrojtjes Popullore Siriane, ose YPG.

Siç shkruan VOA, ministria e Mbrojtjes, ka thënë se në sulmet ajrore, 89 objektiva përfshirë strehime dhe depo municionesh, janë shkatërruar.

“Të ashtuquajturit drejtues të organizatës terroriste ishin në mesin e atyre që u neutralizuan”, thuhët në njoftim.

Sipas Turqisë, sulmet u ndërmorrën bazuar në të drejtën për vetëmbrojtje sipas nenit 51 të Kartës së Kombeve të Bashkuara.

Agjencia shtetërore turke Anadolu ka njoftuar se një ushtar turk dhe dy policë u plagosën si pasojë e një rakete të lëshuar në provincën kufitare siriane Kilis të Turqisë.

Siç ka raportuar Anadolu, raketa goditi një zonë pranë një postblloku kufitar, por nuk dha më shumë detaje.

Më herët, Forcat Demokratike Siriane (SDF) të udhëhequra nga kurdët thanë se do të hakmerren kundër sulmeve ajrore turke të dielën.