Një person është arrestuar nën dyshimin për posedim të narkotikëve në Prishtinë.
Të njëjtit policia i gjeti narkotik në veturë.
Në raportin 24-orësh të policisë thuhet se të dyshuarit i është ndaluar fillimisht vetura dhe gjatë kontrollit në të njëjtën është gjetur dhe sekuestruar substanca narkotike e llojit marihuanë.
Përveç në veturë, policia ka njoftuar se edhe në trupin e të dyshuarit gjatë kontrollit u gjet dhe u sekuestrua substancë narkotike e llojit marihuanë.
“Në konsultim me prokurorin është bërë bastisja në shtëpinë e të dyshuarit, gjatë kontrollit janë gjetur dhe konfiskuar një qese me substancë të dyshuar narkotike e llojit marihuanë me peshë rreth 27 gram, një grinder që shërben për bluarjen e marihuanës, një role me folje që shërben për mbështjellje të marihuanës si dhe dy peshore”, thuhet në raport.
Me vendim të prokurorit pas intervistimit i dyshuari është dërguar në mbajtje.