Ministri i Infrastrukturës, Liburn Aliu, ka deklaruar se nuk është në dijeni në lidhje me raportimet se “shtyllat për ndriçim në autostradën Gjilan-Prishtinë, vijnë nga Serbia”.
Në një konferencë për media, ministri Aliu ka deklaruar se nuk mund të jetë në dijeni se ku prodhohen materialet për autostrada.
“Po e kemi pa dje, po është shqetësuese dhe do të merremi me këtë punë. Pra, ku janë porositë, si janë porositë. Qysh po mendon me qenë unë në dijeni për kompanitë të cilat i realizojnë punët me shiku çfarë produkte kanë ble. Si ministri kush janë prodhuesit nuk është e mundur ta dimë çfarë lloje të produkteve përdorin kompanitë. Por, natyrisht, kur denoncohen dhe del një rast i tillë, natyrisht që merremi me këtë punë”, ka thënë Aliu.
Ai, ndër të tjera, në këtë konferencë ka folur edhe për cilësinë e asfaltit në rrugën Dollc-Gjakovë.
“Po pas këtij rasti kemi dalë me kompanitë dhe menaxherët dhe e kemi parë mundësitë e riparimit dhe cilat masat do të ndërmerren. Është lokacioni që më ka interesuar, pra nuk ka të bëjë me projektin në tërësi”, tha tutje Aliu.
Ndryshe, Ministria e Mjedisit, Planifikimit Hapësinor dhe Infrastrukturës ka shkarkuar dy Komisione vlerësuese për menaxhimin e mbeturinave dhe dhënies së lejeve mjedisore.
Këtë e ka bërë të ditur ministri Liburn Aliu, duke thënë se një kompani ka thënë se ka marrë pëlqim për ndërtimin e inceneratorit termik për trajtimin e mbeturinave.
Pezullohet pëlqimi mjedisor për ndërtimin e inceneratorit në Ferizaj