Gati një e treta e termocentraleve të Ukrainës janë shkatërruar nga sulmet me dronë dhe raketa ruse në tetë ditët e fundit, tha Presidenti Volodymyr Zelenskiy, ndërsa zyra e tij paralajmëroi për një situatë “kritike” të energjisë në mbarë vendin.
Zelenskiy akuzoi Rusinë për përfshirje në “sulme terroriste” që prekin një pjesë të konsiderueshme të infrastrukturës kritike të vendit dhe duke shkaktuar krizë në energjinë elektrike dhe furnizimet e shërbimeve tjera.
“Që nga 10 tetori, 30% e termocentraleve të Ukrainës janë shkatërruar, duke shkaktuar ndërprerje masive në të gjithë vendin.” postoi ai në Twitter. “Sulmet ndaj infrastrukturës civile nuk lanë “hapësirë për negociata me regjimin e Putinit”.
Bombardimet janë shpesh të pasakta dhe shumë civilë janë vrarë në ndërtesa banimi në Kiev dhe qytete të tjera të mëdha, shkruan The Guardian.
Kyrylo Tymoshenko, nënkryetari i zyrës presidenciale, tha se infrastruktura energjetike dhe furnizimi me energji ishin në shënjestër në një lagje lindore të Kievit, ku dy persona u vranë, në qytetet Dnipro dhe Zhytomyr.
“Situata është kritike tani në të gjithë vendin, sepse rajonet tona janë të varura nga njëri-tjetri … është e nevojshme që i gjithë vendi të përgatitet për ndërprerjet e energjisë elektrike, ujit dhe ngrohjes,” tha Timoshenko për televizionin ukrainas.
Dy “objekte të infrastrukturës kritike” u dëmtuan në Kiev, tha kryetari i bashkisë së qytetit, Vitali Klitschko, dhe furnizimi me energji elektrike dhe ujë në “shumë shtëpi” në Kievin perëndimor ishte “pjesërisht i kufizuar”.
Kryebashkiaku u bëri thirrje banorëve që të kursejnë energjinë elektrike dhe tha se shtëpitë që përjetojnë presion të reduktuar të ujit duhet të përdorin ujin sa më “ekonomikisht të jetë e mundur”.
Ukraina kishte kohë që kishte frikë se Rusia do të synonte rrjetet e saj të shërbimeve. Valët e fundit të sulmeve tregojnë se infrastruktura kryesore mbetet e pambrojtur ndaj sulmeve ruse nga ajri.
Një zyrtar perëndimor, duke folur në kushte anonimiteti në një konferencë të martën, tha se ata besonin se Rusia “po ndiqte një strategji të qëllimshme të përpjekjes për të shkatërruar rrjetin elektrik të Ukrainës”.
Një zyrtar perëndimor tha se shumë kolegë brenda aleancës perëndimore “po shikonin se cila mund të ishte paketa e duhur për të mbështetur ukrainasit”.