Autoritetet ukrainase kanë mirëpritur mbërritjen në Turqi të dërgesës së parë të drithërit që largohet nga porti i Odesës në Detin e Zi që kur Rusia filloi pushtimin e saj.
“Anija e parë e mallrave RAZONI me misër mbërriti në Stamboll. Aleatët tanë po na ndihmojnë të luftojmë agresionin rus dhe Ukraina po ndihmon botën për të parandaluar krizën e urisë,” ka thënë në Twitter ministri ukrainas i Infrastrukturës Oleksandr Kubrakov.
Presidenti ukrainas Volodymyr Zelensky është shprehur se kjo dërgesë duhet të jetë e para nga shumë të tjera për të garantuar sigurinë ushqimore brenda dhe në gjithë botën.
“Qëllimi ynë tani është të kemi rregullsi: që kur një anije të largohet nga porti, të ketë anije të tjera… Eksportet këtë vit janë të nevojshme në mënyrë që fermerët dhe kompanitë tona bujqësore të kenë burime të mjaftueshme për mbjelljen e vitit të ardhshëm,” tha Zelensky në fjalimin e tij.
Zelensky ka akuzuar Rusinë për provokimin e krizës ushqimore për të përdorur “furnizimin e grurit, misrit, vajit si armë”.
“Rusia krijon një deficit, luan për të rritur çmimet dhe kur kjo provokon trazira sociale, ajo kërkon lëshime politike. Ajo nuk duhet të funksionojë me ushqim”, tha presidenti ukrainas.
Ai përfundoi se, “kur bota është e bashkuar, kur partnerët përmbushin angazhimet e tyre, mund të arrihet rezultati i nevojshëm. Le të shohim se si do të funksionojë nisma e grurit në ditët në vijim.”