Ish-diplomati, Sylë Ukshini, vlerëson se vizita e komisioneres së Bashkimi Evropian për Zgjerim, Marta Kos, në Kosovë vjen në një moment sensitiv politik, duke e cilësuar atë më shumë si një vizitë simbolike.
I ftuar në “FIVE” në Dukagjin, Ukshini tha se Kos ndodhet në Kosovë në kohën kur vendi është në proces elektoral, ndërsa shtoi se vizita mund të shihet edhe si përmbushje formale e agjendës së saj institucionale.
Mes tjerash, sipas Ukshinit, Kosova nuk ka arritur ta shfrytëzojë si duhet momentumin e krijuar nga zhvillimet gjeopolitike në Evropë, ndryshe nga vende të tjera të rajonit.
“Konsideroj se momentumi është sensitiv pasi jemi në proces elektoral dhe ajo është më shumë vizitë simbolike dhe si komsionore t’ja bëjë një ‘tick’ se ka vizituar Kosovën. Pastaj, janë dy gjëra thelbësore brenda kësaj vizite që perspektiva e integrimit evropian lidhet me çështjen e sigurisë dhe luftën e Ukrainës dhe besoj që Kosova ose nuk ka ditur ose s’ka pasur mundësi ta shfrytëzojë këtë mundësi pasi këto kriza prodhojnë një proces të ri sikur tani që pritet ta shfrytëzojë Mali i Zi dhe Shqipëri teksa Kosova është një pozitën më të pafavorshme në Ballkanin Perëndimor ku as për çështjen e statusit nuk ka ndonjë zhvillim”, u shpreh Ukshini.