Përpjekjet për zbardhjen e fatit të personave që ende figurojnë si të zhdukur nga lufta në Kosovë duhet të jenë gjithëpërfshirëse, të bazuara në të drejtat e njeriut dhe të përqendruara te viktimat dhe familjet e tyre, ka deklaruar Përfaqësuesi i Posaçëm i Sekretarit të Përgjithshëm të OKB-së dhe Shefi i UNMIK-ut, Peter Due.
Në një deklaratë me rastin e Ditës Ndërkombëtare të Viktimave të Zhdukjeve të Detyruara, Due ka theksuar se bashkëpunimi ndërmjet Prishtinës dhe Beogradit është thelbësor për zbardhjen e fatit të personave të zhdukur.
Ai ka thënë se, pavarësisht përparimit të arritur ndër vite, shumë familje vazhdojnë të jetojnë me dhimbje dhe pasiguri për fatin e të afërmve të tyre.
“Çështja e personave të zhdukur nuk duhet kurrë të politizohet. Përparimi domethënës varet nga bashkëpunimi, besimi dhe angazhimi i përbashkët për t’iu dhënë familjeve përgjigjet që meritojnë”, ka thënë Due.
Sipas UNMIK-ut, më shumë se 1,500 persona vazhdojnë të figurojnë të zhdukur që nga përfundimi i luftës në Kosovë.
UNMIK-u ka përmendur edhe zbulimin e fundit të mbetjeve njerëzore në Zubin Potok, të cilat besohet se u përkasin së paku 23 individëve, duke e cilësuar këtë si dëshmi se edhe pas dekadash mund të gjenden përgjigje për fatin e personave të zhdukur.
Due ka bërë thirrje që procesi të vazhdojë me fokus te viktimat dhe familjet e tyre, në mënyrë që ato të marrin përgjigjet që i presin prej vitesh.
Due shprehu solidaritet me familjet që prej vitesh presin informacione për fatin e të afërmve të tyre, duke theksuar se të drejtat dhe nevojat e tyre duhet të jenë në qendër të të gjitha përpjekjeve për zbardhjen e rasteve të personave të zhdukur.
“UNMIK-u do të vazhdojë përkrahjen e ndihmës psikologjike dhe formave të tjera të mbështetjes për këto familje”, ka thënë Due.
Shefi i UNMIK-ut ka bërë thirrje edhe për zbatimin e plotë të Deklaratës së BE-së për personat e zhdukur, si dhe për vazhdimin e punës përmes Grupit të Punës për Personat e Zhdukur, të udhëhequr nga Komiteti Ndërkombëtar i Kryqit të Kuq (KNKK).
Ai ka theksuar gjithashtu rëndësinë e bashkëpunimit të vazhdueshëm ndërmjet Prishtinës dhe Beogradit për gjetjen dhe identifikimin e personave që ende rezultojnë të zhdukur.
Kjo ditë shënon edhe 20-vjetorin e Konventës Ndërkombëtare për Mbrojtjen e të Gjithë Personave nga Zhdukjet me Detyrim, e cila u miratua nga Asambleja e Përgjithshme e Kombeve të Bashkuara më 20 dhjetor 2006.
UNMIK-u ka përsëritur përkushtimin për të vazhduar mbështetjen për familjet e personave të zhdukur, në përpjekjet e tyre për të realizuar të drejtën për të ditur fatin dhe vendndodhjen e të afërmve të tyre, në përputhje me standardet ndërkombëtare për të drejtat e njeriut.