Grupi parlamentar i Lëvizjes Qytetare (URA) dhe Partia Socialdemokrate (SDP) kanë arritur marrëveshje për definimin e prioriteteve për qeverisjen e ardhshme të Malit të Zi, ku sipas ujdisë, politikat shtetërore të Malit të Zi në raport me Bashkimin Evropian dhe Aleancën Veri Atlantike (NATO), janë harmonizuar mes palëve nënshkruese.
Sipas dokumentit të marrëveshjes, dënohet agresioni i Rusisë në Ukrainë, ndërsa nënshkruesit e Marrëveshjes detyrohen të propozojnë në Kuvend miratimin e një akti të veçantë – Rezolutën për agresionin rus, përcjell mediumi malazez CdM.
Palët gjithashtu janë të obliguara që të zbatojnë të gjitha politikat e BE-së, NATO-s dhe Organizatës së Kombeve të Bashkuara (OKB) lidhur me luftën në Ukrainë.
Qeveria e ardhshme malazeze është e detyruar që të bashkëpunoj me NATO-n thuhet ndër parimet kryesore të marrëveshjes së arritur.
Reforma zgjedhore, zhbllokimi dhe zgjedhja e posteve më të larta në gjyqësorë, harmonizimi i ligjeve me kriteret evropiane si dhe me Komisionin e Venecias, janë gjithashtu disa nga temat kryesore të ujdisë.
Të gjitha vendimet që konsiderohen si të kundërligjshme dhe ato që janë të tilla apo që janë kontroverse, sipas marrëveshjes duhet të rishqyrtohen me theks të veçantë në arsim dhe kulturë.
Sa i përket bashkësive fetare, marrëveshja parasheh që të zgjidhen të gjitha çështjet e hapura dhe të vihen marrëdhënie kontraktuale.
Me konsensusin më të gjerë të mundshëm, të akorduarit e marrëveshjes do të bëjnë përpjekjet për propozime dhe miratime të ligjeve dhe vendimeve që janë të një rëndësie të veçantë për shtetin malazez.
Për sa i përket shërbimeve të sigurisë, në marrëveshje parashihet që të ndërmerren “reforma”, andaj kjo shpreh vullnetin politik për zgjidhjen e tyre.
Komisionet qeveritare – në sistemin politik, gjyqësor dhe politika ekonomike, marrëveshja e arritur parasheh që zëvendëskryeministrat të jenë në krye të një departamenti përkatës qeveritar ku do të kryesojnë Komisionet Qeveritare.
