Ende pa u bërë 24 orë prej kur Turqia u godit nga një tërmet i fuqishëm, rrugën për atje e morën pjesëtarët e Forcës së Sigurisë së Kosovës.
Janë këta një kontingjent nga njësitet elite të FSK-së , njësitet e kërkim shpëtimit që u dërguan për mbështetje, rimëkëmbje dhe sanimin e gjendjes pas tërmetit shkatërrimtar.
Në kohë rekorde ministri Armend Mehaj në bashkëpunim me qeverinë, komandanten supreme e Kuvendin, i nisën ushtarët një natë më parë për në Turqi.
Shefi i komunikimit strategjik Gjeneral Sefer Isufi bën me dije se kontingjenti i FSK-së është tejet i përgatitur dhe veçse janë integruar në operacion.
“Kontingjenti ynë siç e dinin është një kontingjent i përberë nga specialistet e kërkim shpëtimit urban, pastaj kemi ekipet përcjellës mbështetje për mjekësi emergjent edhe njësit e e specializuar të K-9. Ky kontingjent menjëherë është integruar në kuadër të Taksë Forcës të Autoriteteve turke” , ka thënë Sefer Isufi – Gjeneral.
Gjenerali Isufi teksa tregon pjesëmarrjen e disahershme të kësaj njësie në operacione ndërkombëtare, derisa thotë se regjimenti i kërkim shpëtimit është ndër asetet më të rëndësishme të FSK-së.
“ Operatorët tanë specialit në fushën e kërkimit, tani përvec janë operator të suksesshëm në terrën ata janë edhe instruktor të nivelit shumë të lartë për të trajnuar të gjithë personalin nga institucionet tjera edhe për rretht 7 viteve ata me suksese trajnonin, në fushën e kërkimi shpëtimit pjesëtarë nga Policia e Kosovës”, ka shtuar Sefer Isufi – Gjeneral.
Nga ana tjetër ish-komandanti i FSK-së, gjenerali Kadri Kastrati thotë se njësiti i kërkim shpëtimit është lider në rajon.
” Ky njësit është lider në rajon. Është njësiti më i përgatitur në rajon sepse qysh nga koha Trupave Mbrojtës së Kosovës edhe FSK-së ka bërë trajnime të shumta edhe e ka qendrën në Pomzotinë Qendrën Rajonale të Trajnimit në Fushën e Kërkimi Shpëtimit. Unë besoj që kz ekipi do ta kryejë detyrën në Turqi me përgjegjësi të lartë”, ka deklaruar Kadri Kastrati – Ish-Komandant.
Ditën e sotme mbërriti në Turqi edhe skuadra e kërkim-shpëtimit dhe e ndihmës shëndetësore e dërguar nga shteti shqiptar siç njoftoi vetë kryeministri Edi Rama.
Përndryshe ekipi i Federatës së Mundjes së Kosovës pjesëmarrëse në Turneun ndërkombëtar në Kahramanmarash të Turqisë kanë qenë atje gjatë tërmetit. Të njëjtit janë evakuuar, janë mirë me shëndet dhe pritet të kthehen në Kosovë.