Komanda Qendrore e ushtrisë së Shteteve të Bashkuara të Amerikës, CENTCOM, ka deklaruar se raportimet për anije të lidhura me Iranin që kanë shmangur bllokadën janë “të pasakta”.
Në një postim në platformën X, CENTCOM njofton se forcat amerikane kanë interceptuar 29 anije që nga vendosja e bllokadës në Ngushticën e Hormuzit.
Sipas tyre, dy tankerë me flamur iranian, “Hero II” dhe “Hedy”, të përmendur në media, nuk e kanë kaluar bllokadën si pjesë e një flotiljeje, por janë ndaluar dhe aktualisht ndodhen të ankoruar në Chah Bahar, në Iran.
Ndërkohë, një anije tjetër, “Dorena”, është shoqëruar nga një destrojerë e marinës amerikane në Oqeanin Indian pasi kishte tentuar të shkelte bllokadën.
CENTCOM thekson se forcat amerikane po e zbatojnë bllokadën në të gjithë Lindjen e Mesme dhe më gjerë, duke shtuar se ushtria amerikane ka “shtrirje globale”.