Forcat e Armatosura të Gjermanisë, Bundeswehr, do t’i nënshtrohen një ndryshimi të rëndësishëm në vitet e ardhshme përmes futjes së një modeli të ri uniforme me shumëkamuflazh, që do të zëvendësojë atë aktualen. Portali gjerman i mbrojtjes Hartpunkt raporton se të gjithë ushtarët duhet të jenë të pajisur me uniformat e reja jo më vonë se viti 2029.
Ministria Federale e Mbrojtjes ka konfirmuar për botimin ushtarak Augen Geradeaus se është duke u angazhuar në furnizimin e trupave me pajisje të reja luftarake, të përshtatura me rritjen e paraparë të personelit ushtarak në 460,000 trupa. Në këtë drejtim, ministria ka paralajmëruar një prokurim urgjent për përshpejtimin e procesit të furnizimit, si dhe lidhjen e kontratave afatgjata për të siguruar vazhdimësinë e pajisjes dhe zëvendësimeve. Megjithatë, për shkak se projekti është ende në zhvillim, nuk është përcaktuar ende një kosto përfundimtare apo një afat i saktë.
Modeli i ri shumëkamuflazh, që më parë përdorej ekskluzivisht nga njësitë speciale si Komanda e Forcave Speciale të Ushtrisë (KSK) dhe Komanda e Forcave Speciale të Marinës (KSM), do të zgjerohet tani për të gjithë ushtrinë. Ky vendim u mor pas një debati të gjatë institucional, ku për vite me radhë Ministria e Mbrojtjes i kishte rezistuar këtij ndryshimi në shkallë të gjerë.
Kalimi në uniformat e reja do të bëhet gradualisht duke nisur nga viti 2026, ndërsa implementimi i plotë pritet të përfundojë deri në vitet 2028-2029.
Arsyet për këtë ndryshim lidhen me përmirësimin e kapaciteteve taktike dhe të sigurisë. Një studim i kryer nga Instituti i Kërkimeve të Bundeswehr-it (Wehrwissenschaftliches Institut für Werk- und Betriebsstoffe) ka treguar se modeli i ri shumëkamuflazh ofron maskim më efektiv në një sërë mjedisesh operacionale, sidomos në hapësira urbane.
Një tjetër arsye është nevoja për të reduktuar dallueshmërinë e forcave speciale gjatë operacioneve të përbashkëta. Deri më tani, uniformat e tyre unike i bënin më të identifikueshme në terren.
Modeli i ri konsiderohet më i përshtatshëm edhe në raport me sfidat e reja klimatike dhe peizazhet në ndryshim, si dhe me përvojat e marra nga konflikti i përmasave të gjera në Ukrainë pas pushtimit rus.