Ushtria e Kinës ka thënë se po vazhdon stërvitjet ushtarake në shkallë të gjerë rreth Tajvanit, pasi stërvitjet e saj të paralajmëruara më parë me zjarr të drejtpërdrejtë përfunduan të dielën e 7 gushtit.
Komanda e Teatrit Lindor të Ushtrisë Kineze është shprehur se do të praktikonte sulme antinëndetëse dhe bastisje detare. Katër ditët e mëparshme të stërvitjeve ishin përgjigjja e Pekinit ndaj vizitës së Kryetares së Dhomës së Përfaqësuesve të SHBA-së, Nancy Pelosi në ishull.
Tajvani ka akuzuar Kinën se kjo e fundit përdor këto stërvitje si praktikë për një pushtim të ishullit.
Të hënën e 8 gushtit, Tajvani tha se avionët dhe anijet kineze, deri më tani, nuk kanë hyrë në ujërat e tij territoriale gjatë stërvitjeve.
Shtetet e Bashkuara, së bashku me Australinë dhe Japoninë, kanë dënuar stërvitjet, duke thënë se objektivi i tyre është të ndryshojnë status quo-në në ngushticën e Tajvanit.
Avionët dhe anijet kineze kanë kaluar vazhdimisht vijën mesatare në ngushticë gjatë stërvitjeve. Por, ministria e Mbrojtjes e Tajvanit tha të hënën e 8 gushtit se linja mesatare ishte e nënkuptuar, që ekziston që nga vitet 1950 dhe ekzistenca e saj ishte një “fakt” raporton BBC.
Uashingtoni ka dënuar, gjithashtu, Pekinin për ndërprerjen e bashkëpunimit me SHBA-në në disa fusha, duke përfshirë ndryshimin e klimës, si hakmarrje për vizitën e zonjës Pelosi.
Pekini e sheh Tajvanin si një provincë të shkëputur që mund ta pretendojë me forcë, nëse është e nevojshme.