Pak javë pasi politikani opozitar serb, Nikola Sanduloviq u maltretua në Serbi për shkak të vizitës në Prekaz, rrugë të njëjtë mori edhe vajza e tij, Klara.
Ngjashëm si babai, ajo u përkul para varrit të Blerina Jasharit dhe kërkoi falje për krimet e shtetit të saj ndaj shqiptarëve.
E, lulet që la mbi varrin e Blerinës patën një mesazh: “Të respektojmë që të mos përsëritet ma”.
“Veprimi i babait tim ishte shumë paqësor ndërsa Qeveria serbe konsideroi që ai kishte kryer një krim prandaj sot vendosa të bëhem kriminele si babai im dhe vendosa të vi këtu e të shpreh ngushëllimet e mija për të gjitha viktimat e pafajshme, në mënyrë që gjenerata ime të vetëdijesohet që duhet të ndalim urrejtjen e të falim njëri-tjetrin dhe gjithashtu të kërkojmë falje”, ka thënë ajo.
Klara gjithashtu tha se frikësohet se mund t’i ndodhë i njëjti trajtim sikur ndaj babait të saj.
“Po, frikësohem sepse po e shoh se në çfarë po kalon babai im dhe e gjithë familja por në mënyrë që të ndalim këtë torturë dhe diktaturë duhet të përballemi me frikën dhe duhet të kërkojmë nga komuniteti ndërkombëtar të rikonsideroj nëse Serbia njëmend është vend demokratik”, ka thënë Klara.
Bashkë me vajzën e Nikola Sandulloviqit ishte edhe nënkryetari i partisë së tij, Mihajlo Todiq, i cili tha se erdhi në Kompleksin Memorial për të kërkuar falje për krimet e Serbisë.
“Kam ardhur në mënyrë që edhe personalisht e edhe përpara delegacionit të Partisë Republikane të bëj nderime, të vendos kurorë lulesh dhe të përkulem përpara varrit të Blerina Jasharit, vajzës shtatëvjeçare që e humbi jetën tragjikisht nga ana e forcave të errëta, të cilat ishin pjesë e politikës destruktive serbe të viteve të nëntëdhjeta të shekullit të shkuar”, ka than Todiq.
Për të bërë homazhe në Prekaz javën e kaluar ishte edhe avokati i Sanduloviqit, Çedomir Stojkoviq, i cili me tu kthyer në Serbi u mor në pyetje nga Agjencia e Inteligjencës së Serbisë.
Pikërisht anëtarë të kësaj agjencie, në fillim të janarit arrestuan dhe keqtrajtuan Sanduloviqin, vetëm pse kishte shpërndarë pamjet nga vizita e tij në Prekaz para një viti.