Në emisionin “Five” në RTV Dukagjin, në lidhje të drejtpërdrejtë ka qenë Kaltrina Zeneli, e cila e ka raportuar rastin e sotëm të ndodhur në rrjete sociale.
Bëhet fjalë për rastin e ndodhur në qytetin e Pejës, më saktësisht, keqtrajtimin e një të moshuare nga infermierja në Shtëpinë e Pleqve “Orenda”.
Zeneli ka treguar se videon e ka pranuar nga një person i panjohur, që ka kërkuar të jetë anonim.
Njashtu, ajo ka thënë se nuk është kontaktuar nga Policia e Pejës, ndërsa nga Prokuroria e Pejës është pyetur për detaje të tjera.
“Në postim e kam përmendur Policinë, por nuk më ka marrë në telefon as nuk më ka shënuar askush i Policisë. Të vetmit janë Prokuroria e Pejës, më kanë pyet cili është institucioni, a kam ndonjë informacion çfarë ka ndodhur”, ka thënë ajo.
Megjithatë, Zeneli ka shtuar se ndihet mirë qe organet e rendit kanë reaguar me kohë dhe që personat që kanë kyer veprën, kanë marrë denimin.
“Po ndihem mirë dhe e lehtësuar që organet kanë reaguar shpejt dhe personat janë aty ku duhet të jenë”, ka theksuar ajo.
Tutje, Zeneli ka shtuar se nuk ka dëgjuar të kenë ndodhur raste të tilla më parë në qytetin e Pejës.
Zeneli ka thënë se ndihet e shokuar nga rasti i ndodhur, madje ajo ka bërë të ditur se kur ka pranuar videon nuk ka bërë asnjë veprim tjetër, përveç që e ka publikuar videon në rrjetin e saj social në Facebook.