Temperaturat e larta që pritet të mbizotërojnë të dielën do të sjellin kufizime të përkohshme për qarkullimin e automjeteve të rënda në autoudhët e Kosovës.
Ministria e Infrastrukturës dhe Transportit ka bërë të ditur se automjetet për transportin e mallrave me peshë të përgjithshme mbi 20 tonë nuk do të lejohen të qarkullojnë në autoudhë nga ora 11:00 deri në 17:30.
Masa është vendosur pasi, sipas parashikimeve zyrtare, temperaturat pritet të arrijnë ose të tejkalojnë 32 gradë Celsius, nivel në të cilin aktivizohen kufizimet për automjetet e rënda.
Kufizimi nuk do të vlejë për rrugët nacionale, rajonale dhe lidhëse, ku kamionët do të mund të vazhdojnë qarkullimin normalisht.
Përjashtim nga masa bëjnë gjithashtu automjetet e Policisë dhe organeve të tjera të sigurisë publike, ekipet emergjente dhe automjetet e institucioneve shëndetësore.
Ministria u ka kërkuar kompanive të transportit dhe drejtuesve të mjeteve të rënda që t’i përshtatin udhëtimet me orarin e kufizimit dhe të respektojnë masat e vendosura.