Janë duke vazhduar protestat në Izrael kundër reformave në drejtësi, duke kundërshtuar kështu planet e kryeministrit Benjamin Netanyahu për të forcuar kontrollin mbi Gjykatën e Lartë.
Kjo protestë po ndodh kur Izraeli po përballet me një rritje të lartë të tensioneve në disa fronte gjatë muajit të shenjtë të Ramazanit.
Rreth xhamisë Al-Aksa në Jerusalem, dhjetëra mijëra besimtarë priten për lutjet e mbrëmjes mes shqetësimeve për një përsëritje të mundshme të bastisjeve të policisë, si ato të kësaj jave që u pasuan nga sulme me raketa ndaj Izraelit dhe sulme izraelite në Gaza dhe Libanin Jugor.
Ndryshimet e propozuara nga Qeveria, që do t’i kufizonin kompetencat e Gjykatës së Lartë për të vendosur kundër legjislativit dhe ekzekutivit, ndërsa do t’u jepnin ligjvënësve të koalicionit më shumë pushtet në emërimin e gjykatësve, kanë shkaktuar krizën e brendshme më të rëndë ndër vite.
Për këtë situatë kritikët thonë se ndryshimet do të dobësonin gjykatat dhe do t’i jepnin pushtet të shfrenuar Qeverisë, duke rrezikuar të drejtat dhe liritë demokratike me efekte të rënda në ekonomi, si edhe marrëdhëniet me aleatët perëndimorë, të cilët kanë shprehur shqetësime.
Për shkak të protestave, kryeministri Netanjaju vendosi në fund të marsit të shtynte miratimin e ndryshimeve në sistemin e drejtësisë. VoA