Zyra e profesorit të Universitetit të Prishtinës “Hasan Prishtina”, Xhevat Krasniqit, i cili po akuzohet për ngacmim seksual ndaj studenteve të tij, është bllokuar me një aksion simbolik nga Lëvizja Feministe Studentore.
“Xhevat Krasniqi nuk ke vend në UP”, “Skenë krimi, mos kalo!”, kështu thuhet në shkrimet e vëna të martën në derën e zyrës, ku pretendohet se profesori në fjalë ka ngacmuar studentet.
“Ende nuk ka vendim për rastin e profesorit të denoncuar për ngacmim seksual, Xhevat Krasniqi. Ai është suspenduar dy herë për ngacmim seksual, njëherë nga Universiteti i Gjakovës, e herën tjetër nga Fakulteti i Mjekësisë në Universitetin e Prishtinës. Ai nuk mund të vazhdojë të mbajë ligjërata në Universitet. Andaj si duhet as zyra, vendi ku shumë vajza kanë dëshmuar që janë ngacmuar”, thuhet në njoftimin e LFS-së.
Ndërkaq, të hënën, studentët dhe aktivistët kanë bllokuar sallën koncertale të Universitetit të Prishtinës, duke ia pamundësuar daljen nga kjo sallë Këshillit të Etikës si dhe profesorit Krasniqi.