Federata e Karatesë së Kosovës të martën mbrëma ka lëshuar një komunikatë, përmes të cilës ka konfirmuar se karateistët kosovarë kanë mbetur jashtë Evropianit për seniorë që fillon të mërkurën në Guadalajara të Spanjës.
Sipas FKK-së, federata spanjolle ka dërguar ftesën zyrtare, por organet shtetërore të Spanjës kanë refuzuar të lëshojnë viza për sportistët kosovarë.
Karateistët kanë udhëtuar me viza të vendeve të tjera e po ashtu me pasaporta të vendeve të tjera. Por telashet kanë vazhduar edhe pas vendosjes në Spanjë.
“Na u komunikua se institucionet spanjolle nuk lejojnë organizatorin që të paraqesë simbolet shtetërore (himnin, flamurin e as mbishkrimin Kosovë) në asnjë prej hapësirave brenda palestrës, përfshirë edhe monitorët në arenë. Këtë informacion nuk e kishim më parë”, thuhet në komunikatën e FKK-së.
Drejtuesit e karatesë kosovare kanë kontaktuar me zyrtarët e federatës evropiane, por ata vetëm kanë shprehur keqardhje që nuk kanë mundësi ta ndryshojnë situatën.
Sipas njoftimit, situata është paraqitur edhe në Kongresin e Federatës Evropiane.
“FKK-ja e indinjuar, por edhe e motivuar për të bërë gjithçka për të ardhmen e karateistëve tanë, kërkon nga të gjithë që të mbështesim garuesit të cilët kanë potencialin e duhur për t’u ngjitur në piedestalin evropian e botëror”, ka shkruar Federata e Karatesë e Kosovës, që ka thënë se çdo veprim e ka bërë në koordinim me MKRS-në.
Për herë të dytë këtë vit, karateistët kosovarë mbesin jashtë Evropianit.
Ata nuk kanë garuar as në Qipro në Evropianin për të rinj, pasi nuk u lejuan simbolet e Kosovës.
Por në vitin 2019 në Evropianin e mbajtur po në Guadalajara të Spanjës, Kosova ishte paraqitur me të gjitha simbolet shtetërore.