Gjykimi në Gjykatën Speciale ndaj Salih Mustafës do të vazhdojë të mërkurën e një qershorit.
Seanca është paraparë të fillojë rreth orën 09:30.
Mbrojtja e Mustafës kishte njoftuar se paraqitja e të gjitha provave në rastin e tij është mbyllur të enjten e 26 majit.
Kështu është bërë e ditur edhe në faqen zyrtare të Dhomave të Specializuara të Kosovës.
Ndryshe, gjatë seancës të zhvilluar më 19 maj, ishte paraparë që të japë deklaratë pa betim i akuzuar për krime lufte, Salih Mustafa.
Por, sipas kryetares së trupit gjykues, Mappie Veldt Foglia, Mustafa kishte shprehur qëllimin për të bërë deklaratë pa betim, jo më larg se më 12 prill 2022.
“Mustafa kishte konfirmuar gatishmërinë për t’iu përgjigjur pyetjeve të trupit gjykues nëse do të kishte në varësi edhe të drejtave të tij për të mos folur, për të heshtur. Arsyeja pse trupi gjykues donte t’iu bënte pyetje ishte për t’u përpjekur për të sqaruar çka ka ndodhur në prill të vitit 1999 dhe cili ka qenë roli juaj nëse keni pasur ndonjë rol në kuadër të aktakuzës së konfirmuar, pyetjet që trupi gjykues s’do t’ua kishte bërë do të ishin parë nga ky këndvështrim”, ka thënë ajo.
Më pak se 24 orë para seancës, mbrojtja ka konfirmuar se e ka rimenduar qëndrimin e tij dhe nuk do të japë deklaratë pa betim dhe nuk do t’iu përgjigjet pyetjeve të trupit gjykues.
Ndërsa, më 22 mars, ish-komandantit të Ushtrisë Çlirimtare të Kosovës, Salih Mustafës, i cili po gjykohet për krime lufte në Dhomat e Specializuara të Kosovës në Hagë, i ishte vazhduar paraburgimi.
Ndryshe, aktakuza ndaj Salih Mustafës ishte konfirmuar më 12 qershor 2020, ku ngarkohet për krime lufte.
“Aktakuza e konfirmuar përcakton se afërsisht midis 1 prillit 1999 dhe 19 prillit 1999, në një kompleks ndalimi në Zllash, Kosovë, u kryen krimet e ndalimit arbitrar, trajtimit mizor dhe të torturës kundër të paktën gjashtë personave.
Në aktakuzë thuhet se “në një datë midis 19 prillit 1999, ose rreth kësaj date, dhe rreth fundit të prillit 1999, në atë vendndodhje u vra një i ndaluar”, ka njoftuar Gjykata Speciale përmes një komunikate.
Sipas aktakuzës së konfirmuar, Salih Mustafa akuzohet në kuadër të formave të ndryshme të përgjegjësisë penale, për ndalim arbitrar, trajtim mizor, torturë dhe vrasje të paligjshme, si krime lufte të kryera në kontekstin e konfliktit të armatosur jondërkombëtar në Kosovë, ose në lidhje me atë konflikt.