Me vetëm letërnjoftim dhe pa dokumente shtesë.
Kështu, në respektim të dakordimit të Brukselit, ka vazhduar kalimi i kufirit në Jarinje mes Kosovës dhe Serbisë.
Qytetarët janë të kënaqur që kalimi i kufirit po bëhet tashmë më lehtë se në të kaluarën.
“Për mua është njëjtë, mirëpo mirë që është arritë një marrëveshje sepse këndej unë kaloj shpesh”, ka thënë qytetari serb, Nebojsha Joksimoviq.
“Po, e kalova kufirin pa ndonjë komplikim, ishte procedurë e thjeshtë, pa ndonjë gjë shtesë”, ka shtuar një qytetar tjetër.
Ky zhvillim, u ka nxitur kurreshtje edhe gazetarëve nga mediat evropiane.
Antonio Sempere, gazetar i të përditshmes së famshme spanjolle, “El Mundo”, ishte prezent gjatë ditës në Jarinje.
“Kjo situatë është e rëndësishme për Evropën dhe Spanja është mjaft prezente në këtë çështje, për shkak të Joseph Borell. Kosova dhe Serbia duhet ta gjejnë një pajtim në të ardhmen, e di se është një problem më i madh se liria e lëvizjes dhe targat, por jam i bindur se do ta gjejnë një marrëveshje edhe për problemet e tjera”, ka theksuar Sempere.
Zbatimi i marrëveshjes nisi në minutat e parë të një shtatorit, përderisa këto automjete u bënë të parat që e kaluan kufirin vetëm me letërnjoftime.
Policia kufitare kishte më shumë punë në këtë kohë, ndryshe nga Njësitë Speciale, të cilat të stacionuara rreth 1 kilometër nga kufiri, qëndruan të qeta.
Implementimin e dakordimit, e vëzhgoi nga afër edhe ministri i Punëve të Brendshme, Xhelal Sveçla.