Këtë të premte do të vazhdojë procesi gjyqësor ndaj Pjetër Shalës në Gjykatën Speciale në Hagë. Kjo seancë nis në orën 09:30 dhe pritet të përfundojë rreth orës 16:00.
Sipas aktakuzës, Pjetër Shala ishte anëtar i Ushtrisë Çlirimtare të Kosovës i stacionuar në Kukës të Shqipërisë.
Shala akuzohet për krime të luftës të ndalimit arbitrar, trajtimit mizor, torturës dhe vrasjes së paligjshme.
Krimet për të cilat akuzohet ai dyshohet se u kryen përafërsisht midis 17 majit 1999 dhe 5 qershorit 1999, kundër personave që u mbajtën të ndaluar në fabrikën e metalit në Kukës, që pretendohet se përdorej prej UÇK-së.
Sipas aktakuzës, viktimat e këtyre krimeve ishin të gjithë shtetas të RFJ-së dhe persona të cilët nuk merrnin pjesë aktivisht në luftime.