I ftuar këtë javë në emisionin “Jeto” me Xheneta Asllanin në Radio Dukagjini ishte psikologu dhe sociologu Besnik Peci, i cili diskutoi vdekjen dhe pasojat që ka tek të tjerët.
Peci deklaroi se procesi i vdekjes së të afërmve është një prej stresorëve të parë dhe më të rëndë për njerëzit, pasi vetëm kur humbim diçka e kuptojmë rëndësinë dhe vlerën e tjetrit, duke theksuar se jeta dinamike na ka bërë që të jetojmë në mënyrë robotike.
Psikologu thekson se si personi që është i sëmurë me sëmundje të pashërueshme, si të afërmit e tij, përjetojnë ankth, stres, si dhe kalojnë nëpër faza depresive, ku e nevojshme është ndihma e psikologut që të tejkalohet situata.
Një person që diagnostikohet me sëmundje të pashërueshme sipas psikologut kalon nëpër 5 faza, mohimi i sëmundjes, luftimi i saj, marrëveshja me vdekjen, depresioni dhe në fund pranimi i sëmundjes dhe paqja. Personat që përballen me një sëmundje të tillë sipas tij, kanë nevojë të shprehen dhe të flasin me personat e afërm.