Shërbimi Korrektues i Kosovës (SHKK) ka njoftuar se në Qendrën e Paraburgimit në Prishtinë ka vdekur të hënën një i burgosur me inicialet V.M.
Siç raporton ekipi i terrenit të TV Dukagjinit, Mjekësia Ligjore tashmë ka mbërritur në Qendrën e Paraburgimit në Prishtinë për të marrë trupin e pajetë të personit të vdekur në këtë qendër.
SHKK-ja nëpërmjet një njoftimi ka bërë të ditur se i burgosuri po trajtohej sipas rekomandimeve të institucioneve shëndetësore publike, e organet kompetente po i zhvillojnë procedurat ligjore.
“Shërbimi Korrektues i Kosovës dhe Departamenti Shëndetësor i Burgjeve njoftojnë se sot rreth orës 07:40 në Qendrën e Paraburgimit në Prishtinë ka ndërruar jetë i burgosuri, V.M. Vdekja është konstatuar nga ekipi i Qendrës Emergjente të Qytetit. I burgosuri ishte duke u trajtuar sipas rekomandimeve të institucioneve shëndetësore publike (IPFK-së)”, thuhet në njoftimin e tyre.
Organet kompetente janë duke i zhvilluar procedurat ligjore, po ashtu, viktimës do t’i bëhet autopsia për të verifikuar shkakun e vdekjes.