Një këmbësore ka ndërruar jetë si shkak i një aksidenti në fshatin Rogovë gjersa gjashtë të tjerë kanë mbetur të lënduar, të premten.
Lajmin për Portalin Dukagjini e ka konfirmuar zëdhënësi i Policisë së Kosovës për rajonin e Gjakovës, Sheremet Elezaj. I njëjti ka bërë të ditur se e ndjera nuk ishte e vetmja të cilës i ishte ofruar tretman mjekësor.
“Në aksidentin e ndodhur sot në fshatin Rogovë (rruga Gjakovë-Prizren), fillimisht është raportuar për tre persona të lënduar (dy këmbësorë dhe njëri nga shoferët e automjeteve). Më vonë trajtim mjekësor ju është ofruar edhe katër personave tjerë (tre pasagjerë dhe shoferit të automjetit tjetër). Rreth orës 16:40 jemi njoftuar se njëri nga këmbësorët (viktima femër), e cila ishte duke u trajtuar në QKUK për shkak të lëndimeve të rënda trupore, fatkeqësisht ka ndërruar jetë”, ka treguar ai.
Krahas kësaj, shoferët e dy automjeteve janë ndaluar për 48 orë.
“Lidhur me rastin është njoftuar Prokurori i Shtetit me vendimin e të cilit dy shoferët e të dy automjeteve të përfshira në aksident, janë ndalur në mbajtje për 48 orë”, ka deklaruar Elezaj.