Ka vdekur në moshën 70-vjeçare poeti e prozatori nga Drenasi, Adem Gashi. Për vdekjen e tij kanë lajmëruar familjarët.
Kështu ka njoftuar djali i tij përmes një postimi në rrjetin social ”Facebook”.
“Të Allahut jemi dhe tek ai do te kthehemi. Sot në mëngjes, baba ynë, Adem Gashi, ndërroi jetë. Varrimi i Ademit bëhet sot (e Martë) në ora 15:00 në fshatin Nekoc\ Drenas”, ka shkruar djali i tij, Dardan Gashi.
Gashi u lind në Nekoc të Drenasit. Ai kreu shkollimin fillor dhe të mesëm në vendlindje dhe në Komoran, ndërsa shkollën Normale dhe studimet për letërsi shqipe në Fakultetin Filozofik në Prishtinë.
Ka punuar si arsimtar e më pas si gazetar në Radiotelevizionin e Prishtinës. Më 1999 u emërua drejtor i Radiotelevizionit të Kosovës.
Nga viti 2002 ka kryer funksione të ndryshme në institucionet shtetërore, sipas fjalorit enciklopedik të Kosovës.
Disa prej veprave të tij poetike janë “Pa ombrellë” 1982, “Duke punuar autoportretin” 1985, “Dorëshkrim i djegur” 2000, “Lulet e vetmuara” 2001, “Lady Mak(th)beth” 2006, “Kthimi i pamundur, Lady” 2013, “Labirinthet e makthit” 2015.