Matteo Messina Denaro, “kumbari i fundit” i mafies italiane, i cili u akuzua për orkestrimin e disa prej krimeve më të tmerrshme të kryera nga Cosa Nostra, ka vdekur pas një sëmundjeje të gjatë.
Agjencia kombëtare e lajmeve Ansa njoftoi vdekjen e tij gjatë natës të së dielës. Kryetari i bashkisë së qytetit qendror italian të L’Aquila, Pierluigi Biondi, konfirmoi vdekjen e Denaro në spital “pas një përkeqësimi të sëmundjes së tij”.
Vdekja e tij “i jep fund një historie dhune dhe gjaku”, ka thënë Biondi, duke falënderuar stafin e burgut dhe të spitalit për “profesionalizmin dhe humanizmin e tyre”.
Messina Denaro vuante nga kanceri në kohën kur u arrestua. Gjendja e tij shëndetësore u përkeqësua në javët e fundit dhe ai u dërgua në një spital nga burgu i sigurisë së lartë në Italinë qendrore.
Mjekët ndaluan së ushqyeri Denaron, pasi ai kishte rënë në koma të pakthyeshme.
Gjatë ditëve të fundit, vajza e tij, të cilën ai e takoi për herë të parë në burg në prill, ishte pranë shtratit të tij, raportoi Ansa.
Në janar, Denaro, 61 vjeç, i cili fshihej që nga viti 1993, u kap në një klinikë private në Palermo, ku ai merrte periodikisht trajtim për një tumor me emrin e rremë Andrea Bonafede.
Në gusht, ai u zhvendos nga burgu i sigurisë maksimale në L’Aquila dhe u shtrua në spitalin e qytetit San Salvatore, pasi shëndeti i tij ishte përkeqësuar dhe ishte “i papajtueshëm” me regjimin e ashpër të burgut nën të cilin mbahej, avokati i tij, tha Alessandro Cerella.
Përgatitjet tashmë ishin duke u zhvilluar për varrimin e tij në varrin e familjes në qytet, së bashku me babain e tij, Don Ciccio, i cili ishte gjithashtu kreu i klanit lokal, sipas gazetës Corriere della Sera.