Të mërkurën e 26 tetorit, Qeveria e Kosovës ka zhvilluar mbledhjen e 102-të me radhë, në të cilën janë miratuar tri projektligje.
Siç njofton Zyra e Kryeministrit, ndër këto projektligje është projektligji për Ekspertët Gjyqësorë i cili përcakton kushtet dhe procedurat e licencimit të ekspertëve.
Po ashtu, projektligji për ndryshimin dhe plotësimin e Ligjit për mbrojtjen e konsumatorit, i cili ka për qëllim harmonizimin me legjislacionin e Bashkimit Evropian dhe ta bëjë edhe më të zbatueshëm Ligjin për mbrojtje të konsumatorit.
Projektligji për Zhvillim Rajonal të Balancuar i cili është në përputhje me legjislacionin evropian dhe përcakton parimet themelore të menaxhimit të zhvillimit rajonal.
Projektligji përcakton edhe orientimet, përgjegjësitë e institucioneve, institucionet financiare dhe rregullat për zhvillimin e balancuar rajonal në Republikën e Kosovës.
Po ashtu, është bërë ndryshimi dhe plotësimi i Programit Legjislativ të Qeverisë së Republikës së Kosovës për vitin 2022.
Ndër të tjera, është themeluar Këshilli Organizativ për shënimin e 110-Vjetorit të shpalljes së Pavarësisë së Shqipërisë.
Iu vazhdua mandati për pesë vjet, Martin Halilaj, hetues i Aksidenteve Hekurudhore në kuadër të Komisionit për Hetimin e Aksidenteve dhe Incidenteve Aeronautike nën mbikëqyrjen e Komisionit për Hetimin e Aksidenteve dhe Incidenteve Aeronautike.
U bë ndryshimi dhe plotësim i Vendimit të Qeverisë Nr.02/85.
U ndanë mjete buxhetore në shumën prej katër milionë e dyqind mijë e njëqind eurosh për blerjen e barnave nga lista esenciale sipas kërkesës së Shërbimit Spitalor dhe Klinik Universitar të Kosovës.
U bë ndryshim dhe plotësimi i Vendimit Nr. 31/99 të datës 30 shtator 2022 për Masat shtesë të Pakos për Ringjalljen Ekonomike për Përballje me Inflacion.
U ndanë mjete buxhetore në shumën prej nëntëdhjetë e dy mijë eurosh për subvencionimin e Samitit të Ballkanit Perëndimor të organizuar nga “The Economist”, i cili u zhvillua gjatë kësaj jave në Prishtinë.
U miratua Strategjia Kombëtare dhe Plani i Veprimit për Menaxhimin dhe Kontrollin e Qenve me dhe pa Pronar në Republikën e Kosovës për vitet 2022-2028, e cila synon rregullimin dhe financimin e menaxhimit të mekanizmave për kontroll të qenve me dhe pa pronar në Kosovë.
Strategjia përcakton edhe koordinimin e institucioneve të nivelit qendror dhe lokal përgjegjëse për zbatim të saj.
Gjithashtu, u miratua edhe Plani i Veprimit 2022-2023 për zbatimin e Strategjisë Kombëtare të Republikës së Kosovës për Parandalimin dhe Luftimin e Ekonomisë Joformale, Pastrimin e Parave, Financimin e Terrorizmit dhe Krimeve Financiare 2019-2023.
Plani liston objektivat, aktivitetet dhe financimin e tyre gjatë zbatimit në periudhën e caktuar kohore.
U aprovua kërkesa e Ministrisë së Bujqësisë, Pylltarisë dhe Zhvillimit Rural, për transfer të mjeteve në shumën prej treqind e nëntëdhjetë e nëntë mijë e dyqind e njëzet e pesë eurosh për transfere deri në 25 për qind të ndarjes së ndikuar negativisht, në kuadër të kategorisë së shpenzimeve “Subvencione dhe Transfere”.
U miratuan tri koncept-dokumente, Koncept-dokumenti për Fushën e Menaxhimit të Financave Publike që do të mundësojë përmirësimin e menaxhimit të Financave Publike dhe i cili rekomandon hartimin e një Ligji të ri për menaxhimin e financave publike.
Koncept-dokumenti për Shoqëritë Tregtare që do të sigurojë nivel më të lartë të ofrimit të shërbimeve ndaj shoqërive tregtare dhe që rekomandon plotësimin dhe ndryshimin e Ligjit për Shoqëritë Tregtare.
Koncept-dokumenti për Inspektimin në fushën e Mjedisit, Ujërave, Natyrës, Planifikimit Hapësinor, Ndërtimit dhe Banimit që synon vendosjen e kritereve për mbikëqyrjen e inspektimeve mjedisore, proces i cili është prioritet i Qeverisë përcaktuar edhe me Planin Strategjik Operacional 2021-2025.
Kabineti qeveritar u informua nga ministri i Administrimit të Pushtetit Lokal lidhur me Koncept-dokumentin për Zgjedhjet Lokale në Republikën e Kosovës.
U miratua vendimi i shqyrtimit të mëtejmë për shpronësimin e pronave të paluajtshme në Livadicë të Komunës së Podujevës, të cilat preken nga ndërtimi i Zonës Ekonomike Industriale në këtë komunë.
Dhe si pikë e fundit e rendit të ditës, u miratua nisma për negocim të Marrëveshjes më Republikën e Maqedonisë së Veriut për bashkëpunim në hartimin e Planit të detajuar për ndërtimin e rrugës Prizren-Tetovë.