Pas më shumë se një viti, Gjykata Kushtetuese e Kosovës më 22 mars, ka dalë me vendim për të ndjerën Sebahate Morina, e cila ishte vrarë nga bashkëshorti i saj.
Në vendim thuhet se institucionet e Kosovës, respektivisht, Gjykata Themelore në Gjilan, Prokuroria Themelore në Gjilan, Stacioni Policor në Graçanicë dhe Prokuroria Themelore në Prishtinë, kanë dështuar ta mbrojnë jetën e të ndjerës Sebahate Morina.
Në lidhje me këtë, Arrita Rezniqi nga Instituti i Kosovës për Drejtësi (IKD), ka thënë se është e çuditshme sesi nuk kanë reaguar akoma krerët e shtetit për këtë vendim që sipas saj ky vendim shënon një fitore të madhe kundër dhunës në familje dhe në baza gjinore.
“Është shumë e çuditshme që nuk ka asnjë reagim të krerëve të shtetit për këtë aktgjykim sepse është e pamundur të mos dihet rëndësia e një aktgjykimi të tillë, dhe nuk duhet të lihen jashtë reagimet në veçanti kur shënohen raste të tilla kur aktgjykimi i Gjykatës Kushtetuese të një rëndësie kaq të madhe vendosin për situata kaq delikatë dhe kaq të rëndësishme”, ka thënë ajo në një linjë të drejtpërdrejtë telefonike në emisionin FIVE.
Po ashtu, ajo ka thënë se para dy vjetëve kishin dërguar një kërkesë Kushtetueses për të kërkuar që të konstatohet që mosveprimet e institucioneve dhe dështimet e kë tyre institucioneve kanë dërguar në shkeljen e drejtës për jetë dhe të konstatohet që këto mosveprime të institucioneve kanë qenë në mospërputhje me konventën e Stambollit.
“Një vendim i tillë përbënë një vendim kyç, shënon një fitore të madhe për luftë n kundër dhunës në familje dhe dhunës me bazë gjinore. Se faktikisht ky rast tashmë është një udhërrëfyes i asaj se si nuk duhet të veprohet se si dhe cilat mosveprime të tyre përbëjnë në dështim institucional”, është shprehur ajo.
Ndërkaq, Rezniqi ka thënë se që nga 22 marsi, është dashur të ketë dorëheqje të akterëve për të cilët është konstatuar që kanë qenë përgjegjës drejtpërdrejtë në shkeljen e drejtës për jetë të së ndjerës, Sebahate Morina.
Ndërsa, të enjten në një konferencë për media, Betim Musliu nga IKD-ja ka thënë se e ndjera Sebahate Morina ishte vrarë me 14 mars si dështim i stacionit policor në Graqanicë, Prokurorisë në Prishtinë, te cilat ishin vërtetuar edhe nga IKD.
Musliu ka fajësuar presidenten e Kosovës Vjosa Osmani, kryeministrin Albin Kurti, ministren e Drejtësisë Albulena Haxhiu dhe ministrin e Punëve të Brendshme Xhelal Sveçla se po heshtin përballë këtij rasti, teksa ka thënë se “heshtja e tyre flet se sa e kanë prioritet mbrojtjen e gruas nga dhuna në familje”.