Flamujt e vendeve anëtare të OKB-së që valëviten rreth qendrës “Rockefeller” në Nju Jork, janë zëvendësuar me vepra të artistëve nga mbarë bota. Aktiviteti i quajtur “Vetëm një tokë” synon ngritjen e vetëdijes për ndryshimet klimatike.
Një nga 193 flamujt e vendosur është krijuar nga piktorja shqiptaro-amerikane, Teuta Ibriqaj. Në një intervistë për Zërin e Amerikës, artistja ka folur mbi idenë prapa punimit të saj dhe rëndësinë e pjesëmarrjes në këtë projekt. Në vend të flamujve të vendeve anëtare të Organizatës së Kombeve të Bashkuara (OKB), në qendrën Rockefeller të Nju Jorkut nga 1 prilli po valëviten, 193 flamuj të krijuar nga artistë në mbarë botën.
Në mesin e tyre është edhe e vepra e artistes shqiptaro-amerikane, Teuta Ibriqaj. Aktiviteti i quajtur “Vetëm një tokë” është realizuar në bashkëpunim me Kombet e Bashkuara dhe Muzeun e Klimës në Nju Jork, me qëllim të rritjes së vetëdijes së shoqërisë rreth kujdesit ndaj mjedisit dhe rreziqeve nga ndryshimet klimatike, transmeton “Zëri i Amerikës”.
Piktorja Ibriqaj tregon hollësitë e punimit të saj “Zgjodha dy ngjyra, ngjyrën e tokës dhe ngjyrën që krijohet kur qielli reflekton në ujin e detit. Të dyjat i ndërlidha dhe veprën e titullova ‘Renditje’. Këtë rënditje e shohim gjithkund ku është toka dhe deti. Qetësia, dheu që është shumë me rëndësi për njerëzimin”.
”Në një mënyrë edhe prejardhjen e kemi nga dheu. E paraqita në një mënyrë harmonike, me disa ngjyra të qeta, duke simbolizuar pasurinë, respektin, dashurinë për njëri tjetrin dhe gjithashtu respektin për tokën dhe ujin”.
Teuta Ibriqaj jeton në Shtetet e Bashkuara nga viti 2008, e cila është duke realizuar një seri veprash mbi gjeneratat ilirie dhe origjinën e shqiptarëve.
“Shumica e njerëzve edhe pse kanë studiuar histori, më pyesin pse nuk kemi dëgjuar kurrë për këto gjëra, janë shumë interesante, kurrë nuk e kam parë këtë vepër, kurrë nuk e kam parë këtë artefakt; Pra është një ide shumë e mirë, shpresoj që do të bëjë bujë”, ka përfunduar artistja.