Kamioni i zjarrfikësve ka zënë vend në oborr tash e tri ditë. Me të hyrë brenda objektit, pak të jep përshtypjen se është shkollë.

Këtë pamje e ka marr Shkolla e Mesme e Mjekësisë “Hysni Zajmi” në Gjakovë, ku uji ka depërtuar brenda hapësirave të saj, pas reshjeve të vazhdueshme të shiut ditëve të fundit.

Por, pavarësisht kësaj, kjo nuk është hera e parë që kjo po ndodh këtu.

“Kjo është hera e dytë që shkolla jonë vërshohet nga reshjet e  shiut. Uji nuk vije nga kanalizimet por nga uji nëntokësore. Kjo pjesa është për kabinete dhe laboratore, ka qenë kabineti i fizioterapisë, kabineti i infermierisë dhe dhoma e shëndetit mëndor, të gjitha këto janë jashtë përdorimit. Edhe klasat janë më lagështi dhe është vështirë prej aromës më mbajtë mësim në këto klasë. Nëse vazhdon më ra shi, prapa në podrumi do të mbushet më ujë”, ka deklaruar Gjokë Tahiri – Drejtor i Shkollës “Hysni Zajmi”.

Në ujë sikurse hapësira e shkollës, janë edhe tokat në Komunën e Gjakovës. Nga drejtoria për mbrojtje e shpëtim në Gjakovë, tregojnë për  pjesët më të prekura nga vërshimet.

“Gjendja në Komunën e  Gjakovës nuk ka qenë e mirë, uji ka depërtua nëpër shtëpi. Uji ka depërtuar në disa familje dhe ato janë larguar. Më të prekurat janë fshati Rugovë e Brekocë. Ekipet janë në teren, janë duke i verifikuar të gjitha rastet”, ka sqaruar Vera Shala-Drejtoria për Mbrojtje dhe Shpëtim, Gjakovë.

Sikurse në komunat tjera, edhe në Gjakovë janë ende duke mbledhur të dhëna nga terreni për të dal pastaj me një shumë financiare të dëmeve të shkaktuara nga reshjet e shiut.