Ministri i Mjedisit, Planifikimit Hapësinor dhe Infrastrukturës, Liburn Aliu ka bërë thirrje të shmangen rrugët që kanë prezencë uji pas vërshimeve të fundit të cilat kanë shkaktuar dëme të konsiderueshme në disa komuna e fshatra të Kosovës.
“Lusim qytetarët për kujdes më të shtuar në orët e ditët në vijim, të shmangin kalimet në rrugët me prezencë uji, e të respektojnë rregullat e qarkullimit rrugor”, ka thënë ai.
Aliu ka dalë në terren, në rrugën Mitrovicë – Zubin Potok, ku gjatë ditës së enjte ka pasur shembje të dheut.
Aliu bëri të ditur se kjo rrugë është pastruar nga kompania përgjegjëse e kontraktuar nga ministria.
“Jemi në rrugën Mitrovicë – Zubin Potok, përkatësisht në fshatin Zubq ku dje ka pasur shembje të dheut, e që sot menjëherë është pastruar. Kompania përgjegjëse e kontraktuar nga MMPHI, ka dalur në terren me ç’rast janë marrë të gjitha masat për zhbllokimin e këtij aksi rrugor, normalizimin e qarkullimit rrugor dhe garantimin e sigurisë për drejtuesit e automjeteve”, ka thënë Aliu.
Ndërkaq, gjendja ende nuk është stabilizuar në disa komuna të Kosovës, si Skënderaj, Klina, Mitrovica, ku ende është duke pasur probleme me vërshime.