Mbrëmja e së enjtes ishte shumë e rëndë për disa nga qytetet dhe fshatrat e Kosovës.
Si pasojë e vërshimeve të vazhdueshme të shkaktuara nga shiu, komunat si ajo e Mitrovicës, Klinës, Istogut e Skënderajt, u përballën me përmbytje nga uji.
Shumë qytetarë u evakuuan në zona të sigurta, dhe për fat të mirë me ndihmën edhe të ekipeve emergjente nuk pati viktima në njerëz.
Në një njoftim të Forcës së Sigurisë së Kosovës, bëhet e ditur se kanë punuar tërë natën për ta menaxhuar situatën dhe për t’u dalë në ndihmë qytetarëve në zonat e prekura nga vërshimet.
“Forca e Sigurisë së Kosovës me ekipet e saj të Kërkim Shpëtimit në ujëra, pas situatës së rënduar të përmbytjeve në vendin tonë, ka ngritur gatishmërinë operacionale, duke marrë pjesë në operacionet e shpëtimit të jetëve të qytetarëve në zonat e prekura Skenderaj, Istog, Klinë dhe Mitrovicë”, thuhet në njoftimin e tyre.
Pasojat materiale deri më tani janë të konsiderueshme, kurse reshjet e shiut kanë vazhduar edhe të premten në disa vende.