Një person 52-vjeçar ka humbur jetën si pasojë e një vetaksidenti trafiku që ka ndodhur paraditen e së hënës në fshatin Shirokë të Suharekës.
Aksidenti është raportuar rreth orës 10:06, ndërsa lajmin e ka konfirmuar zëdhënësi i Policisë së Kosovës për rajonin e Prizrenit, Shaqir Bytyqi.
Sipas Policisë, automjeti drejtohej nga B.U., 52 vjeç, banues në fshatin Shirokë, i cili pas aksidentit ka pësuar lëndime të rënda trupore.
Pavarësisht trajtimit mjekësor, 52-vjeçari nuk ka arritur t’u mbijetojë plagëve të marra. Vdekja e tij është konstatuar nga mjeku kujdestar.
Njësitë kompetente policore, në koordinim me Prokurorin e Shtetit, kanë nisur hetimet për të sqaruar rrethanat dhe shkaqet që çuan deri te ky vetaksident.
Ky është një tjetër rast fatal në trafikun rrugor në Kosovë, në një periudhë kur numri i aksidenteve me pasoja të rënda vazhdon të mbetet shqetësues. Vetëm gjatë ditëve të fundit, gjashtë persona kanë humbur jetën në aksidente trafiku.