Veteranët e Luftës së UÇK-së do të protestojnë nesër në Prishtinë. Protestën e ka paralajmëruar kryetari i OVL-UÇK-së në Pejë, Gazmend Syla.
Sipas njoftimit, protesta do të nisë në orën 18:00, në kundërshtim, sic i ka quajtur “skandaleve qeveritare”, që lidhen edhe me miratimin e pagës minimale, nga e cila janë lënë jashtë veteranët.
“Kundër koordinimit me Milan Radojçiqin! Kundër shkeljes së të drejtave të luftëtarëve të UÇK! Ligji që përjashton veteranët nga paga minimale, u votua turpshëm nga shumica parlamentare. Prandaj kërkojmë nga presidentja që ta kthejë mbrapsht këtë ligj të padrejtë dhe antiUÇK”, thuhet në njoftimin për protestë.
Këto masa ishin paralajmëruar më herët nga veteranët, pas audio-incizimeve të Mimoza Kusarit me Slavko Simiqin, ku dëgjohen duke biseduar për listat e veteranëve.
Atyre do t’iu bashkohen edhe AA-kja, Partia Social Demokrate dhe Nisma Socialdemokrate.