Qëndrimet që Ramush Haradinaj i dha pas mbledhjes së kryesisë së AAK-së, të enjten në mbrëmje, e dëshmuan që edhe deklaritivisht asnjëra parti nga ish-blloku opozitar nuk do ta votojë Glauk Konjufcën për kryeministër dhe kabinetin e tij për qeverisje të re.
Qëndrimet janë të qarta, ata kërkojnë zgjedhje të reja, e Lëvizja Vetëvendosje që e ka edhe një mundësi për qeveri e kërkon votën por jo me marrëveshje politike për ta ndarë pushtetin.
Qeveria kalimtare deri në pranverë në krye me Konjufcën, sipas deputeti Enver Haliti është mundësi e jashtëzakonshme që kërkon reflektim nga opozita e jo refuzim të pavend.
“LVV asnjëherë nuk i është frikësuar zgjedhjeve, dhe ne kemi qenë gati gjithmonë, mirëpo është dëm për shtetin është dëm për insitucionet është dëm që të shkojmë në zgjedhej të reja, pa u votuar buxheti, pa u votuar buxheti i tri komunave, Gjilan, Prishtinë dhe Zubin Potok, pa u votuar plani i rritjes i BE-së dhe i Bankës Botërore, përndryshe VV nuk i frikësohet zgjedhje dhe nuk ia është frikësuar asnjëherë jemi gati”, ka thënë Enver Haliti – Deputeti i Lëvizjes Vetëvendosje.
Haliti nuk ofroi informacione për përpjekjet që po i bëjnë për t’i bindur partitë tjera për t’i votuar duke thënë se ftesat për takim i takojnë mandatarit Kojnufca i cili ka kohë edhe 5 ditë që ta thërras seancën dhe ta testojë veten nëse i ka 61 vota ose jo.
Ky barrikadim i ish-bllokut opozitar dhe i Lëvizjes Vetëvendosje sipas analistëve politikë është papërgjegjësi politike e cila ka sjellë pasoja politike por edhe ekonomike.
Analisti Muhamet Hajrullahu vlerëson se secila parti politike e mbanë një pjesë të fajit.
“Përgjegjësia bie mbi subjektin e parë natyrisht, subjekti më i madh natyrisht por edhe ndaj të tjerëve të cilët nuk janë duke dhënë ndonjë zgjidhje ose duke u bashkuar me e largu Kurtin, sepse atje deri dje thanë se do ta largojnë, pra as nuk po bashkohen me Kurtin e as nuk po bashkohen bashkë për me rrëzu Kurtin”, ka thënë Muhamet Hajrullahu – Analist politik.
Lëvizja Vetëvendosje ka kohë deri më 19 nëntor që ta thërras seancën për votimin e Qeverisë, në rast se nuk votohet e njëjta, zgjedhjet e parakohshme do të mbahen më së largu në javën e tretë të dhjetorit.